विनयी त्रिवेणी गाउँपालिका नवप्रर्तन कार्यक्रमका लागि छनोट

त्रिवेणी न्युज

2025-06-19

दुम्किबास । नवलपरासी पूर्वको विनयी त्रिवेणी गाउँपालिका नवप्रवर्तन साझेदारी कोष परियोजनाको लागि छनोट भएको छ । गाउँपालिकाले प्रस्ताव गरेको प्रविधिमैत्री सिकाइ परियोजना छनोट भएको हो ।
परियोजना मार्फत गाउँपालिका भित्रका विभिन्न ७ वटा माध्यामिक तहका विद्यालयहरुमा प्रविधिमैत्री सिकाइ कार्यक्रम लागु हुने गाउँपालिका अध्यक्ष घनश्याम गिरीले जानकारी दिनुभयो । विद्यालयमा प्रविधिमैत्री सिकाइ र त्यसको प्रत्यक्ष नियमन गाउँपालिका शिक्षा शाखाबाट गर्न मिल्नेगरी स्वीकृत परियोजनाको प्रस्तावना तयार भएको उहाँले बताउनुभयो ।
गाउँपालिका भित्रका भानुदय नमूना माध्यामिक विद्यालय, मणिसंगम माध्यामिक विद्यालय, सुर्यज्योती माध्यामिक विद्यालय, दिपेन्द्र माध्यामिक विद्यालय, भानुदय माध्यामिक विद्यालय धुर्कोट, शिवपुरगढी माध्यामिक विद्यालय र नारायणी गण्डकी माध्यामिक विद्यालयमा परियोजनाको एक करोड ५० लाख रुपैयाँ र गाउँपालिकाको ६५ लाख रुपैयाँ लगानीमा परियोजना कार्यान्वयन हुने प्रमुख प्रशासकीय अधिकृत सुमन पण्डितले जानकारी दिनुभयो ।
परियोजनाका लागि गण्डकी प्रदेश मुख्यमन्त्री कार्यालयले प्रारम्भीक प्रस्तावनामा छनोट भएका स्थानीय तहहरुलाई बिस्तृत प्रस्तावना पेश गर्न सूचना जारी गरेको थियो । बिस्तृत परियोजनाका लागि प्रस्तावना पेश गरेका मध्ये विनयी त्रिवेणी गाउँपालिका पहिलो नम्बरमा छनोट भएको गाउँपालिका शिक्षा शाखा प्रमुख भुपराज पाण्डेले जानकारी दिनुभयो ।
गण्डकी प्रदेश मुख्यमन्त्री कार्यालय मार्फत कार्यान्वयन हुने परियोजनाका यस वर्ष विभिन्न चार वटा स्थानीय तह छनोट भएका छन् ।