स्थानीय तहका कर्मचारी आन्दोलित

त्रिवेणी न्युज

2023-10-10

नवलपुर । सरकारले ल्याउन लागेको सङ्घीय निजामती विधेयकको विरोधमा स्थानीय तहका कर्मचारी निरन्तर आन्दोलित छन् । स्थानीय तहमा पेन डाउन गरेका कर्मचारीहरु अहिले काठमाण्डौं केन्द्रीत आन्दोलन जारी राखेका हुन् । आन्दोलनमा सहभागी हुन देशभरका स्थानीय सेवाका कर्मचारीहरु काठमाण्डौं भेला भएको विनयी त्रिवेणी गाउँपालिकाका लेखा अधिकृत राजु सुवेदीले बताए ।
कर्मचारीले सङ्घीय निजामती सेवा ऐनको सट्टा एकीकृत निजामती सेवा ऐन जारी गर्नुपर्ने, प्रमुख प्रशासकीय अधिकृत स्थानीय तहकै कर्मचारी हुनुपर्ने, अन्तरस्थानीय तहका कर्मचारीको सरुवामा दोहोरो सहमति आवश्यक नपर्ने लगायतका माग अघि सारेका छन् । स्थानीय तह कर्मचारी केन्द्रीय सङ्घर्ष समितिमार्फत आन्दोलनमा उत्रिएका हुन् । गत असोज १४ गतेदेखि काठमाडौँको माइतीघरमा धर्ना जारी छ । कर्मचारीले आफुहरुलाई विभेद गरेको बताएका छन् । कर्मचारीले सहमतिमा सात सय ५३ स्थानीय तहमा वैज्ञानिक पूर्वानुमानयोग्य चक्रीय प्रणालीमा सरुवा गरिनु पर्ने, जुन सुकै तहमा बहाल रहेको कर्मचारीलाई तिनै तहको विज्ञापनमा उमेर हद नलाग्ने र सेवा अवधि जोडिने व्यवस्था गरिनु पर्ने, स्थानीय सेवाका कर्मचारीहरूलाई ट्रेड युनियनको अधिकार प्रदान गरिनु पर्ने लगायतमा माग पनि गरेका छन् ।
कर्मचारीहरुले पेड डाउन (सेवा प्रवाह बन्द) लेखिएको प्रोफाईल समेत अहिले आफ्नो सामाजिक सञ्जालमा अपलोड गरेका छन् । स्थानीय स्तरमा समेत समिति गठन गरेका कर्मचारीहरुले प्रतिनिधि मुलक रुपमा काठमाण्डौंमा सहभागिता र स्थानीय तहमा समेत धर्ना लगायतको कार्यक्रम जारी राखेको सुवेदीले बताउनुभयो ।